Pse është e rëndësishme Tilauah (leximi i Kuranit)?
Tilauah, leximi i Kurani, është një nga adhurimet më të mëdha dhe më të vlefshme për besimtarin. Ajo nuk është vetëm shqiptim i fjalëve, por një lidhje e drejtpërdrejtë me Fjalën e Allahut, që sjell udhëzim, qetësi dhe dritë në jetën tonë.
I Dërguari i Allahut Muhammad ka thënë:
“Më i miri prej jush është ai që e mëson Kuranin dhe ua mëson të tjerëve.” (Buhariu dhe Muslimi)
Kjo tregon se angazhimi me Kuranin –duke e mësuar dhe lexuar e ngrit njeriun në gradat më të larta.
Tilauah ka vlerë të madhe edhe për ata që janë në fillim të saj. Profeti ﷺ ka thënë:
“Ai që lexon rrjedhshëm Kuranin është me melaqet e nderuara, ndërsa ai që e lexon me vështirësi ka dy shpërblime.” (Buhariu dhe Muslimi)
Kjo do të thotë se çdo përpjekje në leximin e Kuranit është e vlefshme dhe e shpërblyer, edhe nëse nuk është e përkryer.
Gjithashtu, leximi i shpeshtë i Kuranit sjell dritë dhe nder për besimtarin:
“Lexoje shumë Kuranin, sepse ai është nur për ty në tokë dhe krenari për ty në qiell.” (Ibn Hibban)
Ndërsa largimi nga Kurani është një humbje e madhe shpirtërore:
“Ai që nuk ka në zemër asgjë nga Kurani është si një shtëpi e shkatërruar.” (Tirmidhiu)
Tilauah është shkak për afrim me Allahun dhe për të qenë nga të zgjedhurit e Tij, siç ka thënë Profeti ﷺ:
“Ata që e lexojnë Kuranin janë të dashurit dhe të zgjedhurit e Allahut.” (Nesaiu dhe Ibn Maxhe)
Prandaj, tilauah nuk duhet parë si diçka e vështirë apo e largët, por si një nevojë e përditshme e besimtarit. Ajo është dritë për zemrën, qetësi për shpirtin dhe udhëzim për jetën në këtë botë dhe në botën tjetër.